Berita Jujur Taon HKBP Pematang Bandar

BARITA JUJUR TAON HKBP PEMATANG BANDAR

RESSORT PEMATANG BANDAR – DISTRIK V SUMATERA TIMUR

  

kamis ; 31 Desember 2014

BARITA JUJUR TAON HKBP PEMATANG BANDAR

RESSORT PEMATANG BANDAR-DISTRIK V SUMATERA TIMUR

PATUJOLO

Pinuji ma Debata Ama ni Tuhan Yesus Kristus, naung umpasupasuhon tu hita ragam  ni pasupasu  partondion sian banua ginjang di bagasan Kristus Yesus.(Epesus1:3). Amen 

Selamat Ujung Taon 2014 ma di hita saluhutna.

Tama do hita jumolo mandok mauliate dohot pujipujian tu Debata pardenggan basa i,  na sai tongtong mandongani hita jala mamasumasu huriaNa sahat tu ujung ni taon 2014 on. Tung godang do angka na uli na tajalo jala tapanghilalahon sian Debata, jala tung naso hasuhatan hita do angka pasupasu naung ta jalo sian asi ni rohaNa, di tongatonga ni Keluarga manang marsasahalak, sahat tu tingki on boi hita marpungu di ujung ni taon 2014 on. Hinorhon ni ido andorang so ta tinggalhon taon 2014 on, jala andorang  so mangalangka hita tu taon na imbaru ima taon 2015, jumolo tatangkasi ma jolo ruji-ruji manang pardalanan ni Hurianta di bagasan na sataon bolon on. Alani i, di Minggu Ujung Taon on tauji ma jumolo manaili tu pudian ni ari di saluhut panghobasionta ganup songon gombaran tu hita laho mangalangka di angka ulaon, program naimbaru tu taon na ro on.

I. PELAYANAN UMUM

1.    Parmingguon na magodang:

Tahalashon do mansai denggan do mardalan parminggu di hurianta manipat dibagasan taon 2014. Adong dua parmingguon na magodang di Hurianta, masuk pukul 10.00 Wib,. Rata-rata kehadiran ni parminggu pagi 250-300 halak,

2.    Partangiangan:

Dipatupa do partiangan di hurianta di lima inganan (Weyk I – IX), i ma di ari selasa . Tahalashon do boi mardalan denggan partangianganta dibagasan taon on, atik pe hurang renta dope hita ruas ni huria laho mandohotisa.

Rata-rata kehadiran ruas tu partangiangan tarlumobi ruas Ama, tatangianghon ma asa lamu tarungkap roha ni angka ama.

No	Rata-rata perbulan	Ama	Ina		N.baoa	N.Borua
1	Rata-rata tiap Minggu	3	20		15	15
2	Rata-rata tiap minggu	12	80	60		60

3.    Pelayanan Pastoral

Dipatupa hurianta do Pelayanan Pastoral, tu angka na patut sihobasan. Isarani:

a.  Pelayanan Pastoral Pranikah. Ima panogunoguon (bimbingan) tu angka ruas ni huria na naeng manjalo pasupasu parbogason. Jala nunga tapatupa pasahat kenang-kenangan sada Alkitab tu na tarpasupasu di Huria on.

b.  Pelayanan  Pastoral tu Na Marsak ala Hamatean. Dipatupa do i marhite acara pangapulion tu bagas keluarga i,m dohot pangurupion songon Tumpak marhite ulaon Diakoni Sosial Huria.

c.  Pelayanan Patoral tu Na marsahit. Ima na patupahon perkunjungan Rumah tangga, nang pe holan mandulo dohot martangiang di bagas na marsahit i. Alai ulaon on hurang dope menjangkau sude angka ruas ni huria, ala dang pintor sigop dipaboa marhite sintua lingkungan.

4.    Pembinaan/Pengajaran

a.   Parguru Malua. Dipatupa do 2 hali saminggu (ditingki ari sabtu dohot minggu), laho manjalo parsiajaran partondion, alai dang sadia molo holan sian Parsikolaan, pembinaan parbinotoan di hata ni Debata, pangantusion taringot tu Huria, pembinaan Mental, Moral dohot Ethika, ingkon jolo tangkas do Marguru asa malua. Di dibulan april na nunga Manghatindanghon Haporseaon angka naung tangkas marguru malua. Jala di tingki on, torop ni Parguru malua nuaeng 49 halak. Alani ingkon na dohot do angkla natoras manosoi nasida asa tu ringgasna marguru. Hombar tu hata ni Debata na mandok: ingkon gogoonmu mangajarhon angka i tu angka anakmu, jala taringotanmu angka i, molo hundulhundul ho di bagasan jabum, manang mardalani ho di pardalanan, manang laho modom pe ho,nang dung hehe muse (5 Musa 6: 7).

b.   Sermon Guru Sekolah Minggu. Ima na dipatupa ganup ari Sabtu mulai pukul 19.00 Wib, niuluhon ni Uluan Huria, dohot Bibelvrow laho mempersiaphon angka Guru sikola minggu mangalehon pangajarion tu angka ianakhonta parsikola minggu.Alai ala ni angka tingki nasida sipata massohot do. Las do roha mamereng haringgason guru sikola minggu ni hurianta molo di ari minggu nai na mangajari angka ianakkonta. Situmpahanta do ulaon nasida tu angka tu taon na ro asa diparade angka alat peraga laho mangurupi dohot memotivasi ianakkonta singkola minggu.

5.  Kegiatan insidental

a.      Denggan do mardalan rapot ni Hurianta laho manotophon program huria taon 2014

b      Denggan do mardalan partangiangan di hurianta na dimulai tanggal mei  jala marujung di bulan Nopember 2012

c      Mutasi: Denggan do dipatupa hurianta laho paborhathon perpindahan Pdt. P.Purba M.Div, na pindah tugas tu HKBPSerdang II, di ari Minggu 30 Juli 2014

d.      Denggan do mardalan acara temu pisah Uluan ni Hurianta di Minggu 30 Juli i ma sian Pdt.P.Purba  na pindah tugas tu HKBP Serdang II, jala manjangon Uluan nabaru Pdt. P.Marpaung.BA, na pindah sian HKBP Sipinggolpinggol

6.    Pelayanan Sakramen

a.   Pandidion Nabadia. Dipatupa do Pandidion Nabadia di taon on, torop ni na tardidi //// halak dohot di tanggal 25 Desember 2014

b.  Ulaon Nabadia. Dipatupa do Ulaon Nabadia 2 hali, di tingki ulaon Manghatindanghon Haporseaon di bulan april 2014, dohot na di parnigotan Ari Hatutubu ni Jesus Natal Umum, 24 Desember 2014,

II. PELAYANAN DEWAN KOINONIA DOHOT SEKSI

A. KOINONIA

Dewan Koinonia i ma organ na sumangkapi dohot na patupahon  angka panghobasion na padasiphon parsaoran nasaroha, na sapingkiran dohot sapanghilalaan di huria, na manghamham seksi sikola minggu, remaja, naposobulung, parompuan dohot ama.

1. Seksi Sikola Minggu

Panghobasion ni Huria tu Sikola Minggu laho marparsaoran dohot Tuhan i, dipatupa do marhite dua parpunguan ima :

1.1.Parpunguan Sikola Minggu Siganup Minggu

Parpunguan Sikola Minggu siganup Minggu na hinobasan ni Parhalado dohot sampulu dua ( 12 ) halak guru sikola minggu. Parpunguan i di bagi tolu horong sikola minggu hombar tu umur/parsingkolaan naung tinontuhon. Laho padasiphon panghobasion tu Sikola Minggu siganup minggu, dipatupa Hurianta do sermon guru sikola minggu sahali saminggu ima di tingki ari Sabtu jam 19.00 Wib

1.2.Dipatupa do Minggu Keluarga di Minggu ketiga  tiap bulan di gereja

1.3.Paskah sekolah Minggu. Dipatupa di ari minggu,20 April 2014, maringanan di kompleks Gereja, kegiatan paskah sikola minggu dipatupa marhite Ibadah, mencari telor paskah, permainan dohot pemberian hadiah.

1.4.Perayaan Natal sikola minggu. Denggan do mardalan natal sikola minggu taon 2014, na dipatupa ditanggal 19-20-2014, kegiatan natal i dipatupa marhite, liturgi,puisi, vocal solo, vocal grup, tarian & tortor,

2. Seksi NHKBP/Remaja

Panghobasion ni Huria tu parpunguan NHKBP/Remaja mardalan do di bagasan dua tingki parpunguan, ima :

2.1.Parpunguan Siganup Minggu

Parpunguan NHKBP/Remaja siganup minggu mardalan do di bagasan las ni roha di tingki ari Sabtu bodarina. Parpunguan NHKBP/Remaja siganup minggu ima parpunguan na patuduhon parsaoran dohot Tuhan i marhite na marsiajar ende pujipujian/koor sipasahaton di pamujion tu Tuhan i di ari Minggu.

2.2.Borhat do naposo bulung tat u HKBP Humbang sipalangka laho kunjungan antar gereja na ni uluhon ni inang Bibelvrow. Jala denggan do mardalan ulaon i.

2.3.Retreat Naposo bulung Salib Kasih Tapanuli,na dibulan April naniuluhon ni sintua ta . St.H .Simajuntak dohot St .E.Simajuntak, jala denggan do mardalan .

2.4.Dipatupa do perayaan Parheheon Tahun Remaja /Naposo Bulung di Tingkat ressort di Hurianta , jala juara I umum do ianakkonta sian hurianta.

2.5.Borhat do ianakkonta Remaja/Naposo Bulung  tu tingkat Distik laho mandohoti kegiatan tahun Remaja HKBP na di patupa ni Distrik V sumatera Timur.

2.6.   Natal remaja/naposo, di ari sabtu 27 Desember 2014, denggan do mardalan

3.      Seksi Parompuan

Panghobasion ni Huria tu seksi Parompuan di bagi dibagasan dua parpunguan bolon, ima

3.1.Parpunguan Ina Huria

Parpungan Ina  Huria ima punguan ina sian sundut na tumua na marparsaoran dohot Tuhan i na pinatupa ni hurianta di tingki ari Kamis botarina. Parpunguan ina Huria ima parpunguan na mangharingkothon parsaoran dohot Tuhan i marhite na  marsiajar taringot tu Hata ni Debata na pinatolhas marhite parjamitaon dohot patananakhon Hata ni Debata huhut marsiajar taringot tu ende pujipujian/koor ganup ari Rabu, masuk pukul 13. 00 Wib, sipasahaton tu Tuhan i di ari Mingguna.

3.2. Mardalan do denggan Natal Ina . na ni dohotan sude ina Per - lingkungan dohot punguan, topet diperayaan hari ibu   22 desember 2014

4.      Seksi Ama

Parguruon ama di ari jumat bornginna jam 20.00 wib , ima dijabu ni ruas.

4.1.   Punguan Ama Huria

-  Parpunguan Ama Huria, ima punguan ama na marparsaoran dohot Tuhan i na dipatupa di tingki ari Jumat bodarina maringanan di jabu ni anggota, masuk pukul 20.00 Wib

5.      Tamu ni Huria

1.1. Ro do tamu ni Huria sian Naposo bulung HKBP Humbang sipalangka , jala denggan parsaoran dohot angka ianakkonta remaja /naposo bulung.

B. DIAKONIA

Dewan Diakonia ima organ na mamingkiri dohot patupahon ulaon asi ni roha; Mardalan do ulaon Diakonia di tonga ni hurianta di bagasan taon on, na patuduhon hasadaon ni roha di saluhut las ni roha dohot arsak ni roha, ima  :

v  Parhalado, Ruas, dohot seksi dibagasan harentaon dohot hasadaon ni roha lahomandulo ruas na tongon di bagasan parsahiton, manungkoli haporseaon ni ruasna marsitaonon, jala parsidohot di ulaon las ni roha.

v  Saluhut do Parhalado, Ruas dohot seksi mangharingkothon haulion ni kompleks pargodungan ni hurianta marhite na patupa ulaon gotong royong.

v  Dipatupa hurianta mangelehon dana social tu ruas ni Huria, na marsahasit, na berduka, dohot tumpak mangurupi dongan na hona bencana alam,)

C. MARTURIA

Dewan Marturia i ma organ na mamingkiri dohot patupahon ulaon marbarita na uli di tongatonga ni huria dohot masyarakat na manghamham seksi sending dohot seksi musik.

Mardalan do ulaon Marturia di tonga ni hurianta di bagasan sataon bolon on, ima :

§  Patupa latihan sosng leader minggu  ditonga ni Hurianta na niuluhon seksi Musik,ima na laho martingki di ari mingguna

§  Patupa Song Leader di ganup kebaktian Minggu laho maguluhon parende on ni ruas ni huria pasahathon ende pujipujian di Tuhan i.Jala dipasahat keluarga amani Alvredo tobing sian Bandar marisido sa set sound system , sian keluarga Op. Ruth br Pasaribu dohot Ama Riski Hutagaol/br Pasaribu sian lingkungan DN_DN 1Set Micropon Wirilles + 2 micropon  Vodium tu Hurianta . ima nuaeng na tapangke on

§  Sipareahanta do tu taon 2015 , asa boi nian taganti organ ta si nuaeng ala nungga hurang denggan .

IV. PANGHOBASION NI PARHALADO/SINTUA.

Di hamauliatehon roha do haradeon ni angka Sintua mangurupi Uluan ni Huria diangka sihobasan. jala sahat tu tingki on nungnga adong 10 halak Sintua jala 3 halak Parguru Sintua. Atik pe godang dope sipareahan hombar tu angka ulaon dohot tohonan naung tajalo gabe sintua. Sipareahanta do tu angka taon na naeng ro, asa lam ringgas hita mandohoti sermon, haringgason tu partangiangan dohot parmingguon. Ai molo so ringgas hita mangulahon angka ulaon tohononanta i boi doi mambahen rumar haparhaladoon i. Alai anggiat ma tu joloan on, lam di tambai Tuhanta haporseaon dohot gogo, hiras ni roha dohot las ni roha, habisuhon dohot hasadaon, lumobi ringgas ni roha mangulahon ulaon haparhaladoonna be. Apostel Paulus mandok ”Ai molo huhatahon Barita nauli i, ndang hasurunganku i, utangku do i, marjea do au, aut so huhatahon i” (I Korintus 9:16), jala sintuhu ni ulaon hasintuaon di dok hata ni Debata:  ”Naeng marsitiopan tu hata haposan, asa margogo laho marhobas marhite poda tohonan, na sintong i” (Titus 1:9). Asa boi lam badia jala lam uli angka ulaon panghobasion, manuju tu panghirimon na naeng sipasahaton ni Debata.

  

VI. STATISTIK HURIA

a.       Badan Penguruh Harian HKBP Pematang Bandar

1.      Uluan Huria           : Pdt P. Marpaung

2.      Bvr Huria               :  Bvr D Sitanggang

3.      Bendahara Huria   : St.M br nainggolan SPd

4.      Parartaon               : St.J.Panjaitan,SH

 Jumlah Parhalado  Partohonan: 12 halak (1 Pandita, 1 Bibelvrow 10 Sintua, 3 Calon sintua)

b.      Statitistik ni hurianta taon 2015 :

                  Ruas na tamba :   Masuk tu Huria  : 5  Halak

                                                 Natubu              : 20 Halak

                  Ruas na moru:

                   -       Namonding 17 halak: Ama 5      ; Ina: 10;       Naposo:2

                   -       Napindah     :  7 keluarga

                   -    Na hona bali Huria : 3 Halak

-       Natardidi       : Juni  17 halak     

                             Desember  21 halak

-       Na Hona RPP        : 2  halak

-     Ruas Parguru        : 3 halak

JUMLAH RUAS HKBP PEMATANG BANDAR , 31-12-2015

NO	LINGKUNGAN	AMA	INA	NAPOSO		DAKDANAK		PUNGU
				BAOA	BORU	BAOA	BORU
1	Kp.Kristen	63	77	58	47	34	37	316
2	Parsaoran	22	30	26	21	11	18	122
3	Bandar Marisi	16	28	19	17	9	19	108
4	Pokan Bandar	27	25	21	20	24	19	136
5	Jln .Perdagangan	63	85	83	70	43	38	382
6	Bukit I	18	24	18	22	9	8	99
7	Dolok Nauli-Dolok Nagodang	24	33	22	23	14	14	130
8	Huta Bagasan	62	83	79	21	43	37	375
9	Ujung Manis	19	27	26	10	20	11	113
		314	412	348	321	207	231	1881

II.    Panimpuli

Huria ni Tuhanta, nunga tapaihutihut ruji-ruji/pardalahan ni Hurianta di bagasan sa-taon 2014 on. Molo pe ta bege Barita Jujur Taon di bagasan tingkion,  marlapatan doi asa taingot  aha naung ta ula/ta bolus, jala boha do perkembangan di hurianta. Asa marhite i gabe adong sada Evaluasi di rohanta, taringot tu na naeng sihobasan di taon 2015 na naeng ro on, asa lam tu dengganna. Ala ni dohonon ma“Sahatsahat ni solu, sahat ma tu bontean ni tigaras, leleng ma hita mangolu, sai sahat ma tu panggabean jala horashoras”. Ima jolo na boi pinaandar di tongatonganta, uli manang hurang uli angka barita na hugurithon hami i, las ma rohanta umbegesa, tutu godang do na so boi tarpatorang di tingki on, angka nataula ganup marsadasada laho pahinsathon parngoluon ni hurianta, alai ganup ma hita masigalmit siubeonta be, “Asa tuat ma siputi nangkok sideak, ia i na umuli, ba i ma tapareak”. Hita do mandalani angka na masa i, sasintongna tu angka na so hea marminggu do tongoson barita jujur taon on, asa diboto nasida manang aha na masa di bagasan na sataon on. Ai anggo angka na ringgas marminggu, nunga diboto hian na masa i. Hami pe sian Parhalado, mansai godang do hahurangannami maradophon hamu angka ruas ni huria, lumobi hami sandiri songon Uluan ni Huria on, jotjot do hamu marsahit, hape sampe malum ndang hea hudulo hami hamu, jotjot do hamu marsak, alai sampe marlasniroha, dang dung hupanghulingi hami hamu, jotjot do hamu malas jala mandele, hape sahat tu sadarion hupasombu hami do hamu. Ipe dohononnami do; Pangula na so hasea do hami, haru na tolap gogonami ndang dope huulahon hami. Tung tangianghon hamu ma hami, anggiat lam huharingkothon hami saluhutna ulaon i.

Asa dohonaon nami ma songon na ni dok umpasa;

·         Bangunbangun sinuan, bangunbangun do salongon, molo na uli sinuan, ba tung nauli do jaloon.

·         Habang pidong sidaodao, didongani sitapitapi, las ma rohamuna manjalo, I dope na tarpatupa hami.

·         Tombak di dolokdolok hatubuan ni sugasuga, na mandanggurhon tu dolok do na marsilehonlehon tu huria.

·         Tubu ma tambinsu di toru ni hariara, sai jumpang ma angka ruas na bisuk, parholong huhut na uli basa.

·         Binsar ma mataniari, poltak mata ni bulan, sai horas ma angka lahilahi, horashoras nang angka parompuan.

·         Mandurung di aek natolu, manjala di siguragura, rap leleng ma hita mangolu, gabe luhut jala sahat tu na  saurmatua.

·         Aek siurukuruk  tu silanlan aek toba, sai unang adong na marungutungut, alai sude ma hita marlasniroha.

·         Rimbur ni pakkat ma tu rimbur ni hotang, Ba tusi hamu mangakkat sai disi ma dapotan pangomoan.

·          Asa titi ni sigompa, golanggolang pangarahutna, tung songoni pe na boi pinatupa, godang ma dihita pasupasuna.

·         Emma tutu.

Songon i ma barita parulaon ni hurianta di bagasan taon on. Marhite i, asa di bagasan sada ni roha dohot si sada pingkiran hita saluhutna laho mangeahi haporluan tu hamajuon di panghobasion di tonga ni hurianta tu taon na ro. Taingot ma pandohan ni Apostel Paulus di 1 Kor 15 : 58 : “Onpe, hamu angka donganku nahinaholongan, marsihohot jala so mubauba ma hamu, jala lam sumurung ma tongtong  di bagasan ulaon ni Tuhan i, ai diboto hamu do : Ndang magopo halojaonmuna di bagasan Tuhan i”. Tuhanta ma mamasumasu hita saluhutna. Ala  ni i  sai  di pasupasu  jala  di  pargogoi  Debata  ma  hita  di  na  mangalangka  tu  taon  2015 na naeng ro. A m e n  !